पुसमा मात्र उठ्यो १ खर्ब ७१ अर्ब राजस्व, ६ महिनामा पौने ६ खर्ब संकलन

चालु आर्थिक वर्षको पहिलो ६ महिना (साउन–पुस)सम्म सरकारले ५ खर्ब ८१ अर्ब ४१ करोड रुपैयाँ राजस्व संकलन गरेको छ, जुन लक्ष्यको ८१.७५ प्रतिशत मात्र हो । यस अवधिमा ७ खर्ब ११ अर्ब २१ करोड रुपैयाँ राजस्व उठाउने लक्ष्य राखिएको थियो । सबैभन्दा धेरै राजस्व पुस महिनामा संकलन भएको छ । पुसमा मात्र १ खर्ब ७१ अर्ब ६३ करोड रुपैयाँ राजस्व उठेको छ, जुन सो महिनाको लक्ष्यको ८९.९६ प्रतिशत हो ।

समग्रमा आयकर संकलन लक्ष्यअनुसार हुन नसक्दा कुल राजस्वमा दबाब परेको अर्थ मन्त्रालयले जनाएको छ । पुससम्म आयकर १ खर्ब ३८ अर्ब रुपैयाँ मात्र उठेको छ, जुन लक्ष्यको ७१.११ प्रतिशत हो र गत आवको तुलनामा २.६६ प्रतिशतले घटेको छ । भन्सार महसुल र मूल्य अभिवृद्धि करमा केही वृद्धि देखिए पनि दुवै शीर्षक लक्ष्यभन्दा कम संकलन भएका छन् । सरकारले चालु आर्थिक वर्षमा कुल १४ खर्ब ८० अर्ब रुपैयाँ राजस्व उठाउने लक्ष्य राखेको छ, तर हालसम्म संकलन वार्षिक लक्ष्यको ३९.२८ प्रतिशत मात्र पुगेको छ ।