नेपाललगायत ७५ देशका नागरिकलाई अमेरिकाको आप्रवासी भिसामा अस्थायी रोक | SA News Nepal अमेरिकी विदेश मन्त्रालयले आगामी जनवरी २१ देखि लागू हुने गरी नेपाललगायत ७५ देशका नागरिकका लागि आप्रवासी भिसा प्रक्रियामा अस्थायी रोक लगाएको छ । स्क्रिनिङ र जाँचका मापदण्डहरू पुनरावलोकन पूरा नहुन्जेलसम्म कन्सुलर अधिकारीहरूलाई विद्यमान कानुनी अधिकार प्रयोग गरी भिसा अस्वीकार गर्न निर्देशन दिइएको मन्त्रालयले जनाएको छ । यो स्थगन अनिश्चितकालका लागि रहने बताइएको छ । अमेरिका प्रवेश गरेपछि आप्रवासीहरू सरकारी सुविधामा निर्भर हुन सक्ने सम्भावना रोक्न तथा सम्बन्धित कानुनको कडाइका साथ कार्यान्वयन गर्न यो कदम चालिएको हो । नयाँ निर्देशिकाअनुसार अब भिसा अधिकारीहरूले आवेदकको उमेर, स्वास्थ्य अवस्था, आर्थिक स्रोत, अंग्रेजी भाषाको ज्ञान र दीर्घकालीन उपचारको आवश्यकता जस्ता पक्षहरूको सूक्ष्म मूल्याङ्कन गर्नेछन् । यस निर्णयले नेपालसहित बंगलादेश, पाकिस्तान, अफगानिस्तान, ब्राजिल, थाइल्यान्ड, इरान, इराक, नाइजेरियालगायत देशका नागरिकहरू प्रत्यक्ष प्रभावित हुनेछन् ।
