अमेरिकी राष्ट्रपति डोनाल्ड ट्रम्पले ग्रिनल्यान्डको पक्षमा उभिएका युरोपेली देशहरूबाट आयात हुने सामग्रीमा १ फेब्रुअरीदेखि १० प्रतिशत भन्सार शुल्क बढाउने निर्णय गरेसँगै युरोपभर तीव्र विरोध सुरु भएको छ । ट्रम्पले यो शुल्क २५ प्रतिशतसम्म बढाउन सकिने चेतावनी पनि दिएका छन् ।
डेनमार्क, नर्वे, स्विडेन, फ्रान्स, जर्मनी, बेलायत, नेदरल्यान्ड्स र फिनल्यान्डमाथि लक्षित यो निर्णयलाई फ्रान्सका राष्ट्रपति इम्मानुयल माक्रोन, बेलायती प्रधानमन्त्री कियर स्टार्मरलगायत नेताहरूले अस्विकार्य बताएका छन् । नेदरल्यान्ड्सका विदेशमन्त्रीले ट्रम्पको कदमलाई ‘ब्ल्याकमेल’को संज्ञा दिएका छन् ।
यता ग्रिनल्यान्डमा पनि ट्रम्पको कब्जा नीतिविरुद्ध अहिलेसम्मकै ठूलो प्रदर्शन भएको छ । राजधानी नुकमा भएको प्रदर्शनमा कुल जनसंख्याको करिब एक चौथाइ मानिस सहभागी भएको जनाइएको छ । ‘ग्रिनल्यान्ड बिक्रीमा छैन’ भन्ने नारासहित प्रदर्शनकारीहरू सडकमा उत्रिएका छन् ।
रणनीतिक रूपमा अत्यन्तै महत्त्वपूर्ण मानिने ग्रिनल्यान्डलाई लिएर अमेरिकाको यो कदमले नाटोभित्र समेत विभाजन ल्याएको छ । युरोपेली देशहरूले अमेरिकाको हस्तक्षेप अस्विकार्य रहेको स्पष्ट पारेका छन् ।
